الاولي علي الدفعة

تحكي احد اعضاء الجروب ابونا سمعان

انا بدرس اقتصاد في سنة ثالثة تجارة انجليزى,وربنا مد ايده معايا اوى ,ففي الترم الاول جبت تقدير 85%وكنت التانية علي التخصص بتاعتي والترم التانى جه و بصراحة ما بذلناش مجهود اوى زى الترم الاول, ومكنتش مصدقة ان ربنا هيقبل مجهودي ده..وكنت واخده ابونا سمعان شفيع في مادة صعبة اوى,بجد الماده دى ناس بتشيلها لحد التخرج وكان قبلها يومين بس والسنه دى الدكتور بتاعها متضايق اوى من الدفعة وزود المنهج علينا زيادة عن كل سنة, بس كنا بنحضر وبنعمل اللي علينا,وكانوا قالوا انهم هيحطوا درجات كبيرة علي الحضور واللي تعدى نسبة غيابة 25%مش هيدخل الامتحان,والموضوع ده كان قلقانا كلنا المهم دخلنا الامتحانات وكانت بتعدى مش عارفة ازاي بس بجد كانت معونه ربنا والمواد اللي كنت بدخل فيها معتمدة علي فيها علي مذاكرتى ما جبتش فيها تقديرات كبيرة زى الباقي ومن اكتر المواد اللي كنت مرعوبة منها كان علشان الدكتور بتاعها ما دخلش ولا محاضرة وكنت بذاكرها مع نفسي علي الانترنت
انا تقريبا الوحيدة اللى جبت فيها 100%...ومادة ابونا سمعان قالوا ان المساعد بتاع الدكتور هو اللي حطها و انو هو اللي هيصحح وكده كلنا عرفنا ان مش هيعدى حد فيها وكانت المفاجأة بجد انى جبت اعلي من زمايلي,,وكمان في مادة تانية الدكتور بتاعها مشرحش اي حاجة في العملي وكنا بنذكروا لوحدنا وحصل ان واحدة زميلتى بتاخد درس فيها شرحت لزمايلنا بس اللي شرح لي نسى يشرح جزئية ولقيتها في الامتحان وبعتوها لي علي ظهر الكالكولتور الاله الحاسبة عشان انقلها,بس رفضت عشان ارفع راس ربنا دا اغلي بكتير من السنة كلها و بكدة هيكون فخور انى ببنتو وكنت عارفة ان المادة دي هتوقع منى التقدير لكن ربنا اكبر بكتيررررفلقيت ان تقدير السنة كلها 80%وكمان ترتيبى الاولي علي الدفعة بتاعتى,
وانا كنت واعدة ابونا سمعان انى ابعت لكم اللي حصل معايا بجد كانت شفاعته قويه جدا معايا طول السنة رغم كل الظروف الصعبة اللي مريت بيها بجد ابونا سمعان قديس عظيم ولا يخذل من يطلبه